Monday, 1 September 2014

మిక్కిలి గౌరవం


"నాకు ఆడవాళ్ళంటే మిక్కిలి గౌరవం."

"మరి నీ భార్యని పుట్టింటికి పంపించేశావెందుకు?"

"మాట తప్పే మనుషులంటే నాకు అసహ్యం. ఇస్తానని ఒప్పుకున్న కట్నాన్ని పెండింగ్ పెట్టాడు మా మామ దరిద్రుడు. ఆ కట్నం వసూలయ్యేదాకా నా భార్యని ఇటు రావొద్దన్నానే గానీ - నాకు నా భార్యంటే మిక్కిలి గౌరవం."

"బయట టాక్ వేరేలా వుందే! నువ్వు కట్నం బాకీకి పదిరూపాయిలు వడ్డీ కట్టి, ఆ వడ్డీకి చక్రవడ్డీలేస్తున్నావని.."

"అవన్నీ పుకార్లు. నమ్మకు."

"మీ అమ్మని వృద్ధాశ్రమంలో వుంచావెందుకు?"

"అమ్మకి గుండెజబ్బు. బాధతో తెల్లవార్లు ఒకటే మూలుగుతుంటుంది. ఆ బాధ చూళ్లేక వృద్ధాశ్రమంలో చేర్పించానే గానీ - నాకు అమ్మంటే మిక్కిలి గౌరవం."

"బయట టాక్ వేరేలా వుందే! ఆవిడ ఆస్తిని నీ పేర రాయించేసుకుని వదిలించుకున్నావని.. "

"అవన్నీ పుకార్లు. నమ్మకు."

"నీ ఇంట్లో ఒక స్త్రీ... "

"ఓ! ఆవిడా? తను నా స్నేహితుడి భార్య. పాపం! భర్త చనిపోయి పుట్టెడు దుఃఖంలో వుంటే, ఇంట్లో ఆశ్రయం కల్పించాను. చెప్పానుగా! నాకు ఆడవాళ్ళంటే మిక్కిలి గౌరవం."

"బయట టాక్ వేరేలా వుందే! ఆమెని నీతో వుంచుకోటానికి నువ్వే ఆమె భర్తని లేపేశావని.. "

"అవన్నీ పుకార్లు. నమ్మకు."